ទីស្តីការក្រសួងមហាផ្ទៃ៖នាព្រឹកថ្ងៃអង្គារ៍ទី២៥ ខែតុលា ឆ្នាំ២០២២ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញដឹកនាំកិច្ចប្រជុំស្តាប់របាយការណ៍ស្តីពីអត្តសញ្ញាណប័ណ្ណដែលផុតសុពលភាព ដោយមានការអញ្ជើញចូលរួមពីសំណាក់ រដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ អគ្គស្នងការនគរបាលជាតិ និងមន្ត្រីពាក់ព័ន្ធជាច្រើនរូប។
សម្តេចក្រឡាហោម ស ខេង មានប្រសាសន៍លើកឡើងថាកិច្ចប្រជុំនាពេលនេះ ពិតជាមានសារៈសំខាន់ដើម្បីពិភាក្សាស្វែងរកវិធានការ ដោះស្រាយបញ្ហាអត្តសញ្ញាណប័ណ្ណផុតសុពលភាពរបស់ប្រជាពលរដ្ឋ ពីព្រោះអត្តសញ្ញាណប័ណ្ណ គឺជាឯកសារដែលចាំបាច់បំផុតសម្រាប់ការបោះឆ្នោតនាពេលខាងមុខ។
ឯកឧត្ដម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម បានធ្វើសេចក្តីរាយការណ៍សង្ខេបជូនសម្តេចក្រឡាហោមនិង អង្គពិធីទាំងមូលបានជ្រាប គិតមកដល់ពេលនេះ មានប្រជាពលរដ្ឋជាង១២លាននាក់ បានទទួលអត្តសញ្ញាណប័ណ្ណ ក្នុងនោះអត្តសញ្ញាណប័ណ្ណត្រូវផុតសុពលភាពនាចុងឆ្នាំ២០២២ មានជាង៨០ម៉ឺននាក់ ខណៈជាមធ្យមបានផ្ដល់អត្តសញ្ញាណប័ណ្ណជូនពលរដ្ឋប្រមាណ៣ពាន់នាក់ក្នុងមួយថ្ងៃ។
ឯកឧត្ត នាយឧត្តមសេនីយ៍ ក៏បានទាញការកត់សម្គាល់ដែរថាចំនួនអត្តសញ្ញាណប័ណ្ណផុតសុពលភាព អាចបន្តកើនឡើងដល់ច្រើនជាង១លាននាក់ បើគិតដល់ខែកក្កដា ឆ្នាំ២០២៣ និងថាក្នុងចំណោមប្រជាពលរដ្ឋមានអត្តសញ្ញាណប័ណ្ណត្រូវផុតសុពលភាពនាពេលខាងមុខនោះ មួយចំនួនបានទទួលមរណភាពមួយចំនួនជាប់ពន្ធនាគារ និងមួយចំនួនធំបានធ្វើចំណាកស្រុក។
ឯកឧត្តម បានបញ្ជាក់បន្ថែមថា អគ្គនាយកដ្ឋានអត្តសញ្ញាណកម្ម បច្ចុប្បន្នកំពុងធ្វើការតាមដាន ត្រួតពិនិត្យតាមបច្ចេកទេស ដើម្បីស្រង់ឈ្មោះ ធ្វើបច្ចុប្បន្នភាពពលរដ្ឋតាមមូលដ្ឋាននិង ត្រៀមផ្គត់ផ្គង់សម្ភារៈសម្រាប់បោះពុម្ពអត្តសញ្ញាណប័ណ្ណដើម្បីផ្តល់លទ្ធភាពឱ្យពួកគាត់អាចប្រើប្រាស់ក្នុងជីវភាពប្រចាំថ្ងៃ ព្រមទាំងយកទៅប្រើប្រាស់ជាឯកសារចូលរួមការបោះឆ្នោតនាពេលខាងមុខ។
សម្តេចក្រឡាហោម ស ខេងបានថ្លែងអំណរគុណចំពោះអគ្គនាយកដ្ឋានអត្តសញ្ញាណកម្មដែលបានធ្វើបច្ចុប្បន្នភាពពាក់ព័ន្ធការងារអត្តសញ្ញាណប័ណ្ណដែលផុតសុពលភាព។ ជាមួយគ្នានោះ សម្តេចក្រឡាហោម ក៏បានណែនាំឱ្យបង្កើតក្រុមកាងារអន្តរអគ្គនាយកដ្ឋាន ដែលមានការចូលរួមសហការ ពីអគ្គនាយកដ្ឋានអត្តសញ្ញាណកម្ម អគ្គស្នងការនគរបាលជាតិ អគ្គនាយកដ្ឋានរដ្ឋបាល ដើម្បីដោះស្រាយបញ្ហាអត្តសញ្ញាណប័ណ្ណអស់សុពលភាពនេះជូនប្រជាពលរដ្ឋឱ្យបានឆាប់រហ័ស៕
