ខេត្តឧត្តរមានជ័យ ៖ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក នៃកងយោធពលខេមរភូមិន្ទ បានឧបត្ថម្ភថវិកាជូនគ្រួសារសពយោធិន០២ រូប ដែលបានពលីជីវិតដើម្បីជួយសង្គ្រោះក្មេងប្រុសលង់ទឹក ០២នាក់ ក្នុងមួយគ្រួសារសពទទួលបានថវិកាចំនួន១០លានរៀល តាមរយៈឧត្តមសេនីយ៍ត្រី ជុយ សីហា មេបញ្ជាការរង និងជាមេបញ្ជាការទិសទី៣ យោធភូមិភាគទី៤។
នៅក្នុងឱកាសចូលរួមរំលែកមរណទុក្ខ ឧត្តមសេនីយ៍ត្រី ជុយ សីហា បានពាំនាំបណ្តាំផ្ញើសាកសួរសុខទុក្ខ និងសាររំលែកទុក្ខពីសំណាក់ឯកឧត្តម ឧត្តមសេនីយ៍ឯក ហ៊ុន ម៉ាណែត ជូនចំពោះក្រុមគ្រូសារសព ដោយបានចាត់ទុកលារបាត់បង់នេះ ជាការបាត់នូវកងទ័ពដ៏អង់អាចក្លាហាននៅក្នុងកងទ័ព
ជើងគោក នៃកងយោធពលខេមរភូមិន្ទ កន្លងមក និងបានចូលរួមបម្រើជាតិមាតុភូមិ និងប្រជាជនប្រកបដោយស្មារតីអង់អាចក្លាហានឆន្ទៈមោះមុត និងហ៊ានពលីជីវិតដើម្បីសង្គ្រោះប្រជាពលរដ្ឋ។
សូមបញ្ជាក់ថា សពយោធិន ២ រូប ដែលពលីជីវិតដើម្បីជួយសង្គ្រោះក្មេងប្រុសលង់ទឹក ២នាក់ ត្រូវបានគ្រួសារសព ធ្វើបុណ្យតាមប្រពៃណីសាសនាក្នុងនោះ ៖
សពទី១ -ពលទោ វ៉ាន ថុន មានអាយុ ២៣ ឆ្នាំ នៅលីវ ត្រូវបានក្រុមគ្រួសារសព យកមកធ្វើបុណ្យនៅគេហដ្ឋានសព នៅភូមិចាន់ក្រហម ស្រុកបន្ទាយអំពិល ខេត្តឧត្តរមានជ័យ។ ដោយឡែកសពទី២ -ពលបាលឯក ឈន សុីដេត មានអាយុ ៣៩ ឆ្នាំ មានប្រពន្ធ ត្រូវបានអង្គភាពរៀបចំធ្វើពិធីបុណ្យនៅបន្ទាយប្រាសាទតាមាន់ ខេត្តឧត្តរមានជ័យ។
គួររំលឹកផងដែរថា ថ្ងៃទី៣០ ខែកញ្ញា ឆ្នាំ២០២២ យោធិនវរសេនាតូច៤២២ របស់កងពលតូចថ្មើរជើងលេខ៤២ ចំនួន០២នាក់ បានទៅបង់ត្រីនៅទីតាំងខាងលើ ក៏ប្រទះឃើញក្មេង០២នាក់ កំពុងលង់ទឹកទើបចុះជួយសង្គ្រោះ ពេលសង្គ្រោះជីវិតក្មេងបានហើយជាអកុសលទឹកហូរគួចខ្លាំងបណ្តាលអោយលង់ស្លាប់ទាំង០២ នាក់តែម្តង។
បច្ចុប្បន្នសាកសពយោធិនទាំងពីរបានរកឃើញហើយ(នៅម៉ោង ១១ និង៣០នាទីម្នាក់ និងនៅរសៀលម៉ោង ១៧ និង១០នាទីម្នាក់ទៀត)៕
