ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន សហការជាមួយ ក្រុមហ៊ុន One Road Group មូលនិធិសប្បុរសធម៌ វ័នរ៉ូដ នៃប្រទេសចិន ដើម្បីរួមគ្នាធ្វើសកម្មភាពមនុស្សធម៍តាមរយៈការចែកកាតាប និងសម្ភារៈសិក្សាជូនដល់សិស្សដែលខ្វះខាត, ពិនិត្យព្យាបាលជំងឺ និងចែកវែនតាម្ញូបជូនដល់ប្រជាពលរដ្ឋក្នុងមូលដ្ឋានខេត្តក្រចេះ ដោយឥតគិតថ្លៃ, ជាមួយនេះដែរ ក្រសួងព័ត៌មាន និង ក្រុមហ៊ុន One Road Group ត្រៀមរៀបចំកម្មវិធីប្រកួតកីឡាបាល់ទាល់មិត្តភាពនៅខេត្តក្រចេះ ក្នុងគោលបំណងដើម្បីអោយយុវជនជៀសឆ្ងាយពីគ្រឿងញៀន មកលេងកីឡាដើម្បីមានសុខល្អ តាមរយៈទិសស្លោក “ប្រជាជនម្នាក់ កីឡាមួយមុខ” “លេងកីឡា ដើម្បីជៀសឆ្ងាយពីគ្រឿងញៀន”។
កិច្ចសហការក្នុងភាពជាដៃគូរសម្រាប់សកម្មភាពមនុស្សធម៍ និងការលេងកីឡាឃ្លាតឆ្ងាយពីការប្រើប្រាស់គ្រឿងញៀនរបស់យុវជននេះ បានធ្វើឡើងក្នុងឱកាស ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន ទទួលពិភាក្សាការងារជាមួយ លោក Kevin Lou នាយកប្រតិបត្តិ និងជាស្ថានិកក្រុមហ៊ុន One Road Group ព្រមទាំងជាប្រធានមូលនិធិសប្បុរសធម៌ វ័នរ៉ូដ ប្រទេសចិន នៅរសៀលថ្ងៃទី០១ ខែកក្កដា ឆ្នាំ២០២៤ ។
ឯកឧត្តម រដ្ឋមន្ត្រី នេត្រ ភក្ត្រា ប្រធានគណៈកម្មការទទួលបន្ទុកផ្សព្វផ្សាយអប់រំ នៃគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀន បានជម្រាបជូនពីគម្រោងក្នុងការរៀបចំកម្មវិធីប្រកួតកីឡាបាល់ទាត់យុវជនក្នុងខេត្តក្រចេះ ក្នុងគោលបំណងលើកតម្កើងវិស័យកីឡាឱ្យរីកចម្រើន បណ្ដុះស្មារតីជំរុញចលនាមហាជនទូទៅឱ្យលេងកីឡា ដើម្បីជៀសឆ្ងាយពីគ្រឿងញៀន និងលេងកីឡាដើម្បីសុខភាព។
ឯកឧត្តម នេត្រ ភក្ត្រា ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានជម្រាបជូនពីគម្រោងចុះធ្វើការពិនិត្យព្យាបាល និងថែទាំសុខភាពជូនប្រជាជនដោយឥតគិតថ្លៃ នៅតាមមូលដ្ឋានខេត្តក្រចេះ និងពិនិត្យភ្នែកដើម្បីចែកជូនវៀនតាម្ញូប ផងដែរ ។
នៅក្នុងឱកាសនេះដែរ ឯកឧត្តម នេត្រ ភក្ត្រា បានសំដែងនូវការអរគុណដល់ ក្រុមហ៊ុន Great Wall Motor (GWM) លក់រថយន្តរបស់ប្រទេសចិន និងអង្គការមូលនិធិសប្បុរសធម៌ វ័នរ៉ូដ ដែលបានផ្តល់កាតាប កូនសិស្សចំនួនជាង ១ ០០០ និងសម្ភារៈសិក្សា ដើម្បីចែកជូនដល់កូនៗរបស់មន្ត្រីរាជការក្រសួងព័ត៌មាន កាលថ្ងៃទិវាកុមារអន្តរជាតិ១ មិថុនា កន្លងទៅនេះ ហើយសម្ភារៈដែលនៅសល់ នឹងយកទៅចែកដល់សិស្សានុសិស្សមានការខ្វះខាតនៅមូលដ្ឋានខេត្តក្រចេះ “ស្នាមញញឹមរបស់កុមារាកុមារីជាស្នាមញញឹមរបស់មាតាបិតានិងថ្នាក់ដឹកនាំគ្រប់លំដាប់ថ្នាក់ “ «ដូច្នេះយើងទាំងអស់ត្រូវចូលរួមផ្តល់ក្តីស្រឡាញ់ ភាពសប្បាយរីករាយ និងក្តីសង្ឃឹមសម្រាប់កុមារទាំងអស់ដើម្បីពួកគេក្លាយខ្លួនជាពលរដ្ឋល្អសម្រាប់សង្គមជាតិ។ កុមារកម្ពុជាទទួលបានភាពសុខសាន្ត និងការបីបាច់ថែរក្សា ដោយក្តីអាណិតស្រលាញ់គ្រប់ៗគ្នា»។
លោក Kevin Lou នាយកប្រតិបត្តិ និងជាស្ថានិកក្រុមហ៊ុន One Road បានបញ្ជាក់ជូនពីជំហរក្នុងការធ្វើកិច្ចសហការជាមួយក្រសួងព័ត៌មាន ដើម្បីធ្វើសកម្មភាពមនុស្សធម៍នានា ដែលក្រសួងបានធ្វើកន្លងមក និងទិសដៅបន្តទៅមុខទៀត ។
ក្រុមហ៊ុន OneRoad Group (Cambodia) Co., Ltd. ដែល ជាក្រុមហ៊ុន វិនិយោគ លើ ការ កែច្នៃ កសិផល កម្ពុជាសម្រាប់ការនាំចេញ និងតាំងលក់យានយន្តនៅក្នុប្រទេសកម្ពុជា តាមរយៈ
ក្រុមហ៊ុនលក់រថយន្ត Great Wall Motor (GWM) របស់ប្រទេសចិន គឺបានចូលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចកម្ពុជា និងផ្តល់ឱកាសការងារច្រើនដល់ប្រជាជនកម្ពុជា ៕ អត្ថបទ៖ ទទក, ផ្សាយដោយ៖ កន ចំណាន 
