ចេញផ្សាយ៖ ថ្ងៃទី២៧ ខែតុលា ឆ្នាំ២០២១
WASHINGTON, (Reuters) - កាលពីថ្ងៃអង្គារិ៍ មន្ត្រីជាន់ខ្ពស់មន្ទីរបញ្ចកោណបានប្រាប់សភាថា សហគមន៍ស៊ើបការណ៍សម្ងាត់សហរដ្ឋអាមេរិកបានវាយតម្លៃថា ក្រុមរដ្ឋអ៊ីស្លាមនៅអាហ្វហ្គានីស្ថានអាចមានសមត្ថភាពវាយប្រហារលើសហរដ្ឋអាមេរិកនារយៈពេលប្រាំមួយខែខាងមុខ និងក្រុមនេះកំពុងមានបំណងវាយប្រហារផងដែរ ។
សុន្ទរកថារបស់លោក Colin Kahl អនុរដ្ឋមន្ត្រីការពារជាតិសម្រាប់គោលនយោបាយ គឺជាការរំលឹកចុងក្រោយបង្អស់ថា អាហ្វហ្គានីស្ថាននៅតែអាចបង្កការព្រួយបារម្ភផ្នែកសន្តិសុខជាតិយ៉ាងធ្ងន់ធ្ងរដល់សហរដ្ឋអាមេរិក ទោះបីជាប្រទេសនេះបានបញ្ចប់សង្គ្រាមដែលមានអាយុកាលជាងពីរទសវត្សរ៍ដោយទទួលបរាជ័យកាលពីខែសីហាក៏ដោយ។
ក្រុមតាលីបង់ដែលបានឈ្នះសង្គ្រាម គឺជាសត្រូវរបស់រដ្ឋអ៊ីស្លាម ហើយការប៉ុនប៉ងរបស់ក្រុមនេះក្នុងការរៀបចំច្បាប់ និងសណ្តាប់ធ្នាប់ បន្ទាប់ពីសហរដ្ឋអាមេរិកដកកងទ័ពចេញពីប្រទេសនេះ បានទទួលបរាជ័យដោយការបំផ្ទុះគ្រាប់បែកអត្តឃាត និងការវាយប្រហារផ្សេងទៀតដែលអះអាងជា ទង្វើដោយ រដ្ឋអ៊ីស្លាម។
ដោយការវាយប្រហារទាំងនោះរាប់បញ្ចូលទាំងការបំផ្ទុះគ្រាប់បែកជាច្រើនគ្រាប់សំដៅទៅលើក្រុមនិកាយ Shi’ite ភាគតិច និងហើយក្រុមរដ្ឋអ៊ីស្លាមបានកាត់ក្បាលសមាជិកម្នាក់នៃកងកម្លាំងជីវពលតាលីបង់នៅក្នុងទីក្រុង Jalalabad ភាគខាងកើត។
នៅក្នុងសក្ខីកម្មនៅចំពោះមុខគណៈកម្មាធិការសេវាកម្មប្រដាប់អាវុធព្រឹទ្ធសភា លោក Kahl បាននិយាយថា ករណីនេះនៅតែមិនច្បាស់ថាតើ ក្រុមតាលីបង់មានសមត្ថភាពក្នុងការប្រយុទ្ធប្រឆាំងនឹងរដ្ឋអ៊ីស្លាមប្រកបដោយប្រសិទ្ធភាពដែរឬទេ បន្ទាប់ពីសហរដ្ឋអាមេរិកដកកងទ័ពចេញប្រទេសនេះកាលពីខែសីហា។ សហរដ្ឋអាមេរិកបានប្រយុទ្ធប្រឆាំងនឹងក្រុមតាលីបង់ និងក្រុមវាយប្រហារផ្សេងទៀតដូចជា ក្រុមរដ្ឋឥស្លាម និងក្រុមអាល់កៃដាជាដើម។
លោក Kahl បាននិយាយថា “នេះគឺជាការប៉ាន់ស្មានរបស់យើងថា ក្រុមតាលីបង់ និងក្រុម ISIS-K គឺជាសត្រូវស្លាប់រស់។ ដូច្នេះ ក្រុមតាលីបង់មានការជំរុញខ្ពស់ក្នុងការកំចាត់ក្រុម ISIS-K ។ លោកគិតថា សមត្ថភាពរបស់ពួកគេដើម្បីធ្វើដូច្នេះគឺត្រូវការប្តេជ្ញាខ្ពស់” ដោយប្រើប្រាស់អក្សរកាត់សម្រាប់រដ្ឋអ៊ីស្លាមនៅអាហ្វហ្គានីស្ថាន ៕
