ជនសង្ស័យជាមុខសញ្ញាជួញដូរ ដឹកជញ្ជូនគ្រឿងញៀនឆ្លងដែនចំនួន០២នាក់ត្រូវបានសមត្ថកិច្ចឃាត់ខ្លួន !!!
ចេញផ្សាយ៖ ថ្ងៃទី១៨ ខែតុលា ឆ្នាំ២០២១
ផ្សាយដោយ: គេហទំព័រ ខេមបូឌាស្តាដេលីញូយ៍
ខេត្តស្វាយរៀង ៖ ដោយអនុវត្តតាមបទបញ្ជាដ៍ខ្ពង់ខ្ពស់របស់ឯកឧត្តម នាយឧត្តមសេនីយ៍សន្តិបណ្ឌឹត នេត សាវឿន អគ្គស្នងការនគរបាលជាតិ និងក្រោមការដឹកនាំចង្អុលបង្ហាញពីឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន និងក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង ដោយមានការសម្របសម្រូលនីតិវិធីពីឯកឧត្តម ខាំ សុផារី ព្រះរាជអាជ្ញា និងលោក ឈុីវ អុិចគង់ ព្រះរាជអាជ្ញារងអមសាលាដំបូងខេត្តស្វាយរៀង កាលពីថ្ងៃទី១៣ ខែតុលា ឆ្នាំ២០២១ វេលាម៉ោង១៩និង៣០នាទីយប់នៅចំណុចផ្លូវបេតុង ស្ថិតក្នុងភូមិតាបិប សង្កាត់បាវិត ក្រុងបាវិត ខេត្តស្វាយរៀង កម្លាំងអធិការដ្ឋាននគរបាលក្រុងបាវិត ដឹកនាំដោយលោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុងបាវិត សហការជាមួយកម្លាំងជំនាញការិយាល័យប្រឆាំងគ្រឿងញៀនខេត្ត បានបើកប្រតិបត្តិការស្រាវជ្រាវបង្ក្រាបករណីជួញដូរ ដឹកជញ្ជូនគ្រឿងញៀនឆ្លងដែន០១លើក ដោយបានឃាត់ខ្លួនជនសង្ស័យចំនួន០២នាក់:
១.ឈ្មោះ ឡេ វ៉ាន់ថ អាយុ១៨ឆ្នាំ ភេទប្រុស ជនជាតិវៀតណាម មុខរបរជាងឈើ រស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ(ជាអ្នកដឹកជញ្ជូនគ្រឿងញៀនពីរាជធានីភ្នំពេញ ឆ្លងដែនទៅកាន់ប្រទេសវៀតណាម)។
២.ឈ្មោះ វ៉ាន់ សុផា អាយុ២០ឆ្នាំ ភេទប្រុស ជនជាតិខ្មែរ មុខរបរជាងឈើ រស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ(ជាអ្នកដឹកជញ្ជូនគ្រឿងញៀនពីរាជធានីភ្នំពេញ ឆ្លងដែនទៅកាន់ប្រទេសវៀតណាម)។
វត្ថុតាងរួមមាន ៖
– ថ្នាំញៀន ប្រភេទហេរ៉ូអុីន ទម្ងន់ ៣៥០២ក្រាម
– ថ្នាំញៀនប្រភេទមេតំហ្វេតាមីន ទម្ងន់ ២៩៨៦ក្រាម
– ថ្នាំញៀន ប្រភេទកេតាមីន ទម្ងន់ ១៣០០០ក្រាម(សរុបទម្ងន់ ១៩kg៤៨៨ក្រាម)
– អាវុធខ្លីធុន K54ចំនួន០១ដើម បង់០១ គ្រាប់ចំនួន០៨គ្រាប់
– ម៉ូតូ ០១គ្រឿងនិងកាបូបធំ សំរាប់ដាក់គ្រឿងញៀនចំនួន០១។
បច្ចុប្បន្ន ៖ ជនសង្ស័យជាមុខសញ្ញាជួញដូរ ដឹកជញ្ជូនគ្រឿងញៀនឆ្លងដែនចំនួន០២នាក់(ជនជាតិវៀតណាម០១នាក់)រួមជាមួយវត្ថុតាងថ្នាំញៀនចំនួន១៩kg៤៨៨g អាវុធខ្លីK54០១ដើម ត្រូវបានកម្លាំងជំនាញផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តស្វាយរៀង បញ្ជូនទៅកាន់សាលាដំបូងខេត្តដើម្បីចាត់ការបន្តតាមនីតិវិធី ៕
