លោក សូ ប្លាតុង អភិបាលស្រុកប្រាសាទបាគង ខេត្តសៀមរាប បានឱ្យដឹងនៅថ្ងៃទី២៩ ខែមករា ឆ្នាំ២០២៤នេះថា ប្រជាពលរដ្ឋនៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប តែងតែប្រារព្ធពិធីចាប់ត្រីរួមក្នុងត្រពាំងមួយកន្លែងដែលពួកគាត់អភិរក្ស ដែលពិធីនេះគ្រោងធ្វើឡើង ចាប់ពីម៉ោង៦៖៣០នាទីព្រឹក ថ្ងៃទី១១ ខែកុម្ភៈ ឆ្នាំ២០២៤ខាងមុខនេះ។
លោកបន្តថាពិធីចាប់ត្រីនេះ ត្រូវបានធ្វើឡើងរាល់ឆ្នាំទៅតាមទម្លាប់ នៅក្នុងត្រពាំងបឹងមួយ ដែលអ្នកភូមិបានអភិរក្សត្រីរួមគ្នាទុកមិនឱ្យ មានការនេសាទផ្តេសផ្តាស់កន្លងមក ដោយទុកសម្រាប់ធ្វើពិធីចាប់ត្រីរួមគ្នាក្នុងឱកាសធ្វើពិធីបុណ្យឡើងមាឃ ឬឡើងអ្នកតា តែប៉ុណ្ណោះ។ ប៉ុន្ដែក្រោយពីអ្នកភូមិបង្កោង ធ្វើពិធីចាប់ត្រីរួមគ្នារួចហើយ ទើបអ្នកភូមិផ្សេងមានសិទ្ធិមករកត្រី នៅក្នុងត្រពាំងបឹងនេះ នៅថ្ងៃបន្ទាប់ទៀតបាន។
ពិធីចាប់ត្រីរួមគ្នានេះ ត្រូវបានអ្នកភូមិធ្វើឡើងជារៀងរាល់ឆ្នាំ បន្ទាប់ពីបញ្ចប់ការងារច្រូតកាត់ និងដាក់ស្រូវក្នុងជង្រុករួចរាល់។ ការចាប់ត្រីនេះ គណៈកម្មការនឹងកំណត់ជាពីរផ្នែក ដោយមួយផ្នែក ប្រជាពលរដ្ឋទាំងអស់ក្នុងភូមិបង្កោងអាចរកត្រីទុកសម្រាប់ខ្លួនឯងផ្ទាល់ និងមួយផ្នែកទៀតនៃ បឹង ដែលមានដាក់សម្រាស់ការពារមិនឱ្យចាប់ពីដំបូងនោះ ត្រូវទុកចាប់រួមសម្រាប់ធ្វើជាម្ហូបក្នុងពិធីបុណ្យរួម៕ រាយការណ៍ដោយលោក ឃុត សៅ / AKP-សៀមរាប, ផ្សាយដោយ៖ កន ចំណាន
